martes, 24 de abril de 2018

Cine na Quinta

Xa podemos anunciarvos que o xoves, 3 de maio, haberá na biblioteca unha nova sesión de cine para o alumnado de Primaria. Trátase dunha nova entrega da saga Los pitufos. Unha película que combina imaxe real con animación.



Ao entregar a autorización, recibirás a túa entrada.



"O cine serve, como outra expresión artística, para enfrentarnos coa nosa propia visión do mundo"
Antía Díaz Leal

Tardes de sol ... e de cine!

Seguimos conmemorando a Semana do Libro. Nesta ocasión cunha sesión de cine club para o alumnado de 3º e 4º da ESO interesado en ver as películas das novelas homónimas: Agua e Wonder.

O xantar foi ao aire libre, aproveitando o bo tempo. 


Despois fixemos dous grupos para o visionado das películas.

 E rematamos a sesión cun cine forum nas escaleiras do xardín traseiro do colexio.
Pasamos unha tarde estupenda!
"Deberíase poder ver unha película sin volume e entender a historia".
Linda Seger

luns, 23 de abril de 2018

Día do Libro 2018

A biblioteca estendeuse hoxe aos corredores, exteriores e distintos recunchos do centro para ser testigo do apadriñamento lector que tivo lugar con motivo do Día Internacional do Libro 2018.

Aínda que nun principio valoramos que os alumnos/as de cursos superiores exercesen de padriños e madriñas lectores dos máis pequenos, consideramos que a experiencia sería máis enriquecedora se tamén os cativos lesen aos maiores.

Os obxectivos que se acadan con esta actividade non só gardan relación co ámbito lector, senón que tamén é unha ocasión perfecta para fortalecer vínculos entre o alumnado do centro: compartindo momentos de charla , intercambiando impresións e participando nunha agradable XORNADA DE CONVIVENCIA.

Unha oportunidade de aprender a pensar cos libros: cos contos, coas novelas, coa poesía, co teatro... aprender a pensar coa convivencia... Porque ao final trátase diso, de aprender a pensar xuntos, de APRENDER A PENSAR ENTRE TODOS.

"Se queres que os demais che digan o que tes que facer, non leas. Se queres que os demais che digan o que tes que pensar, non leas. Se queres que a publicidade che diga o que tes que mercar, non leas. Se queres vivir coma un robot que outras persoas programan, non leas. Non leas, porque a lectura é incómoda. Non leas porque a lectura che revolve a cabeza. Non leas porque a lectura te pon contra as cordas. Non leas, porque a lectura é rebelión. Así que, por favor, é mellor que non leas." 
Fran Alonso


venres, 20 de abril de 2018

The Long and Winding Road

"Largo e sinuoso é o camiño" cantaban os Beatles... e quizais así sexa o percorrido que teñan que facer estas mochilas viaxeiras ata chegar ás casas dos nosos usuarios e usuarias, cargadiñas de libros e películas para toda a familia.
Os fogares encheranse de imaxinación e historias que contar.
 <<Cando era pequeno, miña nai sempre me dicía que a felicidade era a clave para a vida. Cando fun á escola, preguntáronme que quería ser de maior, escribín "feliz". Dixéronme que eu non entendía a pregunta. Eu contesteilles que non entendían a vida>>.
John Lennon

xoves, 19 de abril de 2018

Contos de boas noites

Aroa de 3º B e Xoel de 3º A de Primaria recoméndannos o volume I e II, respectivamente, do libro Cuentos de buenas noches: niñas rebeldes. Unha obra que narra a vida de mulleres valentes e loitadoras, que sobresaíron no pasado ou que o fan no presente nalgún ámbito.

Ata nos contan cal é a historia que máis lles gustou. Moi atentos!

 Que ben o contáchedes! Noraboa!

"Dígoche o que é a liberdade para min: non ter medo"
Nina Simone

mércores, 18 de abril de 2018

Recén chegados!

Incorporamos ao noso catálogo máis novidades. Os libros xa están na biblioteca, á vosa disposición. Atoparedes obras para todos os gustos.

Se che apaixonan as historias divertidas, Los peores niños del mundo é o libro que estás buscando, xa que conta as trasgadas de dez nenos e nenas nas que non deixarás de rir en ningún momento.

Por outra banda, queremos destacar Pequeñas cosas. Unha novela gráfica sen letras pero chea de luz. Un libro que trata os medos e ansiedades infantís.

Non podía faltar a ciencia nas novas incorporacións. Co libro Conceptos científicos en 30 segundos aprenderás a descubrir o mundo que te rodea.



Para os lectores expertos tamén temos sorpresas.
Por petición popular, incorporamos o best- séller Por trece razones.
Queremos sinalar , ademais, estoutras:
Tinta y fuego, unha novela imprescindible para os amantes do xénero fantástico.
Tú &Yo. Aquí, ahora, un libro que trata sobre as barreiras invisibles que hai entre a amizade e o amor, a importancia de vivir aquí e agora.
George, unha historia tenra e conmovedora. Un libro para aprender a aceptarnos como somos.





E se eres seguidor do superheroe procedente do planeta Krypton, esta é a túa sección. Goza coas aventuras de Superman!



" Se un libro está ben escrito, sempre me parece que é demasiado curto".
Jane Austen

martes, 17 de abril de 2018

Burbulla científica

Esta mañá, durante o recreo, varias axudantas da biblioteca de 5ºB transportaron ao alumnado de 2º de Primaria a unha burbulla científica.
Goya, Lucía, María, Dafne e Elisa realizaron dous experimentos sinxelos no Laboratorio Ángel Carracedo. 

Arco da vella con cacahuetes
Para o primeiro experimento só empregaron cacahuetes con chocolate de cores, auga e pratos brancos. 

 Colleron os pratos, botaron a auga e colocaron os doces nos seus bordes. Ao pouco tempo, os colorantes comezaron a disolverse e a expandirse polo líquido, creando unha composición moi vistosa.

Extracción de ferro dos cereais
O segundo experimento consistiu en ver a cantidade de ferro que teñen os cereais, unha comida que nos aporta unha boa fonte de enerxía cada día. Para iso, trituraron os cereais e despois achegáronlle un imán para extraer o ferro que contiñan.


"Son das que pensan que a ciencia ten unha gran beleza. Un científico no laboratorio é tamén un neno colocado cara fenómenos naturais que lle impresionan coma un conto de fadas"
Marie Curie