venres, 23 de febreiro de 2018

Un venres na Quinta, é un venres aproveitado

Celia, alumna de Secundaria, impartiu a terceira sesión do obradoiro de manga. Hoxe visualizaron unha serie xaponesa de animación, anime, fixándose nas expresións e movementos para logo poder plasmalos no papel.

Os gañadores e gañadoras do concurso de investigación de mulleres científicas estiveron montando a figura da impresora 3D que recibiron como premio.



E atento o alumnado de Primaria porque o vindeiro xoves , 1 de marzo, poderedes desfrutar dunha sesión de cine de animación. No momento de entregar a autorización, recibiredes a entrada. Bule, que se acaban;)


E por último, deixámosvos a  foto de familia do voluntariado co seu distintivo.

                
"Encántanos visitar
a biblioteca escolar,
hai libros a montóns
e maxia polos rincóns"
Carmen Gil

xoves, 22 de febreiro de 2018

3, 2, 1...

Xoves de cine!
Un total de 21 alumnos e alumnas de Secundaria aterrizaron por unhas horas en Marte para porse na pel do astronauta protagonista da película de Ridley Scott.

Pero antes da misión tocaba coller forzas!

Unha vez relaxados nas butacas, desfrutaron dos momentos de emoción, drama, supervivencia e humor da película.



Por outra banda, esta mañá tivo lugar a entrega de premios aos gañadores e gañadoras do concurso de investigación sobre mulleres científicas. Todos os participantes recibiron unha chapa, calendario e marcapáxinas co cartel ilustrado polo noso director, Xosé Tomás, para as bibliotecas escolares de toda Galicia. Os gañadores, ademais, recibiron unha figura feita coa impresora 3D.

María Lorenzo, Carlota Carrero e Alba González, de 6º B, foron as premiadas na categoría de Primaria.
 Lucas González e Xoel Rodríguez, de 2ºB, os gañadores de Secundaria.
 Por último, unha foto de todos os concursantes.
Moitas gracias por participar!
E mañá...

mércores, 21 de febreiro de 2018

Recomendación lectora

Hoxe, Día Internacional da Lingua Materna, queremos facer fincapé na importancia de ler e expresarnos na nosa lingua nai para evitar o seu desuso. E aproveitamos a ocasión para recibir a recomendación literaria en lingua galega dun gran lector; o seu nome é Khaled e cursa 5ºB. 


"Son unha persoa anticuada que cre que ler libros é o pasatempo máis fermoso que a humanidade nos concedeu"
Wislawa Szymberska

martes, 20 de febreiro de 2018

MatDance

Hoxe tivo lugar a primeira das catro sesións de MatDance que vai impartir Mercedes Prieto, profesora de Danza con máster en Ciencias da Educación, na Quinta dos Libros para o alumnado de 3º de Primaria. 

Trátase dun proxecto basado nas conexións creativas que se establecen entre a Matemática e a Danza; unha maneira lúdica de desenvolver os contidos matemáticos a través da expresión corporal. 

Pasárono xenial experimentando fisicamente e traballando en equipo.





E mañá o alumnado de Secundaria xa poderá recoller na biblioteca a entrada para asistir a sesión de cine deste xoves.


"A arte potencia as capacidades intelectuais dos nenos e nenas"
M.J. Roldán

luns, 19 de febreiro de 2018

Arrancamos semana!

O centro está a participar no Concurso Rosalía de Castro organizado polo Concello de O Rosal. Cada participante debe elexir un poema en lingua galega da escritora e decorar a plantilla coa súa imaxe.



E esta semana volve o XOVES DE CINE para o alumnado de Secundaria. 


"Sempre sentín, en calquera lugar ao que fun, que se había unha biblioteca....estaría ben"
Maya Angelou

venres, 16 de febreiro de 2018

Na Quinta pasan cousas

Venres, 9:00 horas da mañá, un novo día no centro por escribir e unha xornada máis na que nos espazos da Quinta dos Libros comezan a pasar diferentes cousas:

Iria e Zaira, alumnas de 4º da ESO, explícanlles no laboratorio aos nenos e nenas de 3º de Primaria, a través dun experimento sinxelo, como é un líquido non newtoniano. Para iso só precisan fariña de millo (maicena) e auga. Á primeira vista trátase dun líquido coma calquera outro, mais unha vez que comezan a darlle golpes secos podemos apreciar como a mestura se mantén sólida, mentres que se sumerximos a man lentamente actúa coma un líquido.

Observamos tamén como algunha usuaria apura coas últimas respostas do concurso de investigación de mulleres científicas.

E para finalizar vemos desfilar a “comparsa” de mochilas cara as casas rosaleiras, quizais para compartir en familia as últimas lecturas do Entroido.

O resumo deste venres da Quinta, no seguinte vídeo:


"As bibliotecas son as portas de entrada ao Universo"
Jackie Anton 

xoves, 15 de febreiro de 2018

A Biblioteca ou o lugar para xerar aprendizaxes

Esta semana a Quinta dos Libros énchese de actividades para conmemorar o Día da Muller e a Nena na Ciencia.

Por todos é coñecida a desigualdade de xénero existente nos sectores da ciencia. De aí a importancia de ofrecerlle aos nosos alumnos e alumnas, por igual, a oportunidade de desenvolver a vocación científica desde as primeiras idades.

Esta mañá, cinco nenas de 6º, Ángela, India, Lea, Nerea e Noa prepararon no Laboratorio "Angel Carracedo", dependencia máis da biblioteca, un obradoiro científico sobre a célula e o ADN , destinado ao alumnado de 5º de Primaria. 

Por outra banda, a biblioteca tamén dá a posibilidade de desenvolver o traballo cooperativo, compartindo recursos e espazos á vez que se realizan tarefas conxuntamente, nas que o alumnado se axuda e se anima á hora de aprender. Por este motivo,  como é o caso da materia de Inglés de Secundaria, teñen lugar diaramente clases lectivas na Quinta dos Libros.
Hoxe mesmo, investigaron en lingua extranxeira sobre mulleres científicas a través dos ordenadores e tablets. 


Podedes ver o resumo da xornada neste vídeo:

"As mulleres temos o mesmo potencial para facer ciencia. Non se lle dá as mesmas oportunidades nin se lles valora tanto coma aos homes"
Gabriela González